第一年嚟英國冇收入都要報稅？ 可能導致申請居留失敗？
呢篇文章刊登之後收到唔少朋友意見，以下有幾點補充：
- 如果申請咗分年處理，喺報稅嘅時候係唔需要報香港部份嘅收入。資料來源：稅務局官方討論區 >
- 就以上第一點， 陳生同陳太如果申請咗分年處理就無需要報香港部份嘅收入。
- 咁陳太咪冇嘢需要填？咁唔使報稅啦！？呢個係我哋暫時未係好清楚嘅地方，正常如果申請分年處理，需要填報 SA109 俾稅局知道，如果你乜嘢都唔交上去，分年處理會唔會自動生效呢？ 如果唔會自動生效，將來會唔會被稅局話冇報第一年嘅稅呢？
- 以上第三點我哋暫時未有確實答案，希望有專業嘅稅務師可以俾少少意見我哋同埋各位讀者。
- 我哋嘅建議未必適合每個人，但係為咗順利居留入籍英國，盡力做一個良好公民就最好，將風險減到最低，因為香港人已經冇地方可以去…
正文：
討論呢個題目之前要帶返個頭盔，我哋唔係專業稅務顧問，以下內容為個人分享， 並不是專業意見。
英國同香港稅制好唔同， 要交稅嘅項目亦都比香港多，今日集中講吓第一年嚟到英國點樣處理報稅。唔好以為嚟到英國之後冇收入就唔需要報稅， 漏報稅項最嚴重係可以被英國當局取消居留權！
首先英國稅務年度係由每年嘅 4 月 6 日至到第二年嘅 4 月 5 日，喺呢段期間你成為稅務居民，按道理你要將整個稅務年度期間所賺到嘅錢報稅。點樣同幾時會成為稅務居民喺網上面已經有好多討論，我哋用最保險嘅方法去估計，第一日入境英國已經係稅務居民，應該唔會錯得去邊。
陳生陳太的例子
陳生陳太係香港居民，喺香港有工作，有小朋友。陳生一家申請 BNO Visa 入境英國。入境英國之前陳生陳太賣咗自住嘅樓，辭去工作， 最後出糧日子係 11 月 30 日。陳生一家於 2021 年 12 月 1 日入境英國，入境英國後先租住酒店，於 2021 年 12 月 25 日開始租屋，租約為期一年。
陳先生於 2022 年 1 月 1 日開始於英國工作，有固定月薪。
陳太太入境英國後並沒有工作，全職家庭主婦，直至到 2022 年 4 月 5 日期間，完全沒有收入。
陳生陳太需要報稅嗎？
時間來到 2022 年 4 月 6 日，陳生一定要報稅因為有工作，陳太雖然完全冇收入，但係都要報稅！留意要報稅不等於要交稅！
首先兩位喺今個稅務年度已經係英國稅務居民，正式來講應該係佢租到屋嗰日開始計算，即是 12 月 25 日。留意並唔係要等183日之後， 再講一次唔係183日之後先至開始係稅務居民！相關資料大家可以喺網上面搵搵，已經有好多人講過。
陳生自不然要報稅，雖然英國公司已經幫佢報咗薪俸稅，但係今個年度陳生係稅務居民，係入境之前所賺嘅錢，例如薪酬，賣樓所得到嘅資產增值，股票買賣等等按道理係應該要報稅交稅。
咁咪好唔公平？等等，英國政府都好公道，對於剛剛嚟英國定居嘅人，第一年係可以申請分年處理( Split Year Treatment )！ 陳太嘅情況亦都一樣，雖然嚟到英國之後完全冇收入，但係喺呢個稅務年度之內，佢喺香港有薪酬，有收入，我哋建議都照報稅，申請分年處理，清楚俾稅務局知道你嘅稅務狀況，按道理陳太應該係唔需要交稅。
乜嘢係分年處理？
簡單講就係將你係一個稅務年度嘅時間分為稅務居民部份以及非稅務居民部份。 陳生陳太嘅例子， 2021 年 4 月 6 日至到 2021 年 12 月 24 日就係非稅務居民嘅時間，2021 年 12 月 25 日至到 2022 年 4 月 5 日。分隔點就係開始長租一間屋嗰日。以下為官方網頁，裏面有好多個例子解釋不同情況點樣計算分隔日。根據官方例子，如果你未嚟英國之前已經租到或者買咗屋，分隔日就會係你入境嗰一日。
點樣準備報稅？
就以上例子，要申請分年處理，必定要申請自行評稅 (Self Assessment)，申請自行評稅需要有 National Insurance Number (NI)，有咗 NI 之後可以喺網上開戶口自行評稅。成功後你會收到一個稅務編號 (UTR – unique taxpayer reference)，咁就可以報稅。
一般報稅可以選擇郵寄表格，或者網上填表。但係就陳生陳太例子，需要申請分年處理，係需要填一張叫做 SA109 嘅表格。而呢張表格係冇得網上遞交，需要寄返去！坊間亦都有報稅系統可以支援網上遞交 SA109 。
如果係郵寄表格報稅，報稅限期就會係該稅務年度完結後同一年嘅 10 月 31 日，即係陳生陳太需要喺 2022 年 10 月 31 日之前報稅。係呢個日期之前要申請好晒以上嘅嘢。 如果選擇網上報稅，截止日期就會係2023年1月31日之前。
冇按時報稅有乜後果？
英國可以拒絕你申請長期居留或者入籍！當你申請長期居留或者入籍英國嘅時候，政府當局會參考你稅務狀況，有例子係會拒絕你申請。 根據統計， 2020 年有 2480 宗個案因為申請人沒有良好品格，其中包括稅務問題，被拒絕入籍英國。
資料來源 一 > 被拒絕申請入籍常見原因
資料來源二 > 因為簡單稅務問題被拒絕長期居留
雖然離開報稅仲有一段時間，但係因為要申請好多嘢，早啲開始都係好事。做足功夫，香港人齊上齊落，希望大家都順順利利！以上資料純粹係一個概述，非專業意見，如有稅務需要，請聯絡專業人士。
獅子山廣場係一個免費嘅平台。一個屬於英國香港同路人嘅平台！
嚟到英國有嘢想同人分享？有嘢想推介或提下人唔好中伏？想睇吓一啲貼地嘅生活資訊？想開創事業？自己做 Freelance？想搵香港人幫手？想搵食譜？ 想更加容易管理刊登資訊同書簽？想收到我哋最新資訊？
歡迎註冊做獅子山廣場 Lion Rock Plaza 會員 ！香港人自助互助！
如果你覺得我哋嘅資訊有用，可以幫忙撳吓廣告，以維持本站運作，謝謝。
jes
2022-01-19 at 9:51 amthanks for info
獅子山廣場 Lion Rock Plaza
2022-01-19 at 3:49 pm感謝您！