Articles

UK living tips and recipe
免稅股票投資戶口 Stocks and Shares ISA

免稅股票投資戶口 Stocks and Shares ISA

英國政府為咗鼓勵市民儲蓄,制定左幾種個人儲蓄戶口 Individual Saving Accounts (ISA),放喺裏面嘅錢賺咗嘅話係唔需要交稅。 其中包括:

  • cash ISA – 現金個人儲蓄戶口: 比較銀行高息嘅儲蓄戶口,可放現金或購買公司政府債券等。
  • stocks and shares ISA – 股票個人儲蓄戶口: 可以投資基金股票嘅戶口,投資產品視乎不同公司而定。
  • innovative finance ISA – 創新經濟個人儲蓄戶口: 私人借貸收取利息或眾籌投資。
  • Lifetime ISAs – 終生個人儲蓄戶口: 40歲或以下先至可以開,每年只能夠入 £4,000, 每年政府會俾返存款嘅 25% 或最高 £1,000 落你個戶口,最多供到50歲。

英國政府有關 ISA 的官方網頁 >

Stocks and Shares ISA 介紹

係英國投資股票,如果有賺取金錢,係需要交資產增值稅 Capital Gain Tax,如果有股息 Dividend,亦唔需要計入個人入息交稅。 Stocks and Shares ISA ,簡單咁講,用呢個戶口去投資任何產品,如果有賺錢,一毫子稅都唔使交唔駛報。

開戶口要求:

  • 年滿十八歲。
  • 有 National Insurance Number。
  • 通常需要上載身分證明,例如英國車牌 / 護照。

如果未有 National Insurance Number 可以睇吓以下網址點樣申請:

申請 National Insurance Number >

如何操作 Stocks and Shares ISA?

你可以有多個一種類型嘅 ISA 戶口,可以喺唔同嘅銀行或者機構開設多於一個戶口。 每個稅務年度年每個人可以入總額不超過 £20,000 去不同 ISA 戶口。稅務年度係由每年嘅4月6日至第二年嘅4月5日。

戶口裏面嘅資產係無限的,你可以年年入,例如你五年每年都入£20,000 去 Stock and Shares ISA,咁你嘅戶口總額就會有 £100,000 ,如果你投資嘅產品有賺到錢,唔需要報稅亦都唔需要交稅。當然投資有風險,你有機會蝕錢的。

你可以隨時由 Stocks and Shares ISA 提款,完全冇限制。 不過通常都唔會隨便攞錢,因為每年有存款上限,攞咗錢之後亦唔會增加存款上限,變相你減少左你可以免稅投資嘅款項。

如何選擇 Stocks and Shares ISA 公司?

好多銀行或者財務機構都有提供 Stocks and Shares ISA,選擇之前可以留意以下收費:

  • 月費:每個月固定嘅月費,就算有冇買賣都好都要俾。
  • 資產管理費:有某啲公司唔會有固定月費,會因應你戶口嘅資產多少或種類而收取管理費。
  • 交易手續費:每次買賣嘅手續費。
  • 外匯兌換手續費:Stocks and Shares ISA 只接受存入英鎊,如果你要投資非英鎊股票,例如美國嘅蘋果公司股票,要首先將英鎊轉做美元,購買股票。將來售出美元股票,亦要做一次美元轉返做英鎊嘅手續,再將英鎊轉返入你戶口。
  • 提款或存款手續費。

例子:

Hargreaves Lansdown STOCKS AND SHARES ISA 收費:

無需開戶費, 存入款項冇手續費,無月費,但會依據你資產多少而收費。

根據上面嘅收費表, 假設你個戶口持有一半基金,一半股票,戶口總資產 £20,000. 咁一年嘅收費就會係 £20,000 x 0.45% = £90. 即是每個月 £7.5。

另外 Hargreaves Lansdown 每次交易需要收取手續費由 £11.95 至 £5.95 不等,視乎交易次數。

Hargreaves Lansdown 收費網頁 >

低手續費 Stocks and Shares ISA 推薦

大公司一般手續費比較高,例如大家成日用嘅 High Street Bank: HSBC, Barclays. 專門做投資嘅機構手續費就會比較低。以下為大家介紹兩間。

Freetrade

英國公司,2016 年成立,主要提供股票投資戶口,亦設有 Stocks and Shares ISA。 公司估值 USD $330 Million。

收費:

  • 月費: ISA £3 (如果有 Freetrade Plus 股票戶口則免費。)
  • 資產管理費:0
  • 交易手續費:0
  • 非英鎊產品外匯兌換手續費: 即期利率 Spot Rate + 0.45%
  • 提款或存款手續費:0
  • 有英國存款保障 FSCS
  • 投資產品:某部份英國及某些美國股票 / ETF (一般美國 ETF 未有在英國註冊,故此英國大部份股票戶口都不能夠投資美國 ETF,除非你係專業投資者資格。)

Freetrade 詳細資料及收費 >

Interactive Broker UK

美國上市公司,於 12 個國家設有辦事處, 公司市值 USD $28.3 Billion。呢間大家都好熟悉,兌換外幣匯率最好,剛剛今年2022年一月份於英國推出 Stocks and Shares ISA。 如果你已經有 IB 戶口,需要另外再開一個 ISA 戶口。已有客戶開設 ISA 戶口基本上係即時,仲可以即時入錢。

收費:

  • 月費: ISA £3 (交易手續費可抵銷月費)
  • 資產管理費:0
  • 交易手續費: 英鎊投資產品少於 £6000,£3 一單。多於 £6000, 交易金額 x 0.05% 一單。 美國股票,USD 0.005 一股。
  • 非英鎊產品外匯兌換手續費: 即期利率 Spot Rate + 0.03%
  • 提款或存款手續費: 存款免費,每個月一次免費提款。
  • 有英國存款保障 FSCS。
  • 投資產品:海量!澳洲,奧地利,比利時,加拿大,法國,德國,立陶宛,香港,意大利,日本,墨西哥,波蘭,星加坡,南韓,西班牙,瑞士, 英國,美國。

IBUK 詳細資料及收費 >

選擇 Stocks and Shares ISA 留意事項

第一要睇吓有冇啱自己嘅投資產品,某啲公司只提供少量基金選擇,連股票都買唔到。比較收費,花啲時間研究吓各項收費,通常網頁都有清楚列明。

用上面兩間公司做例子, Freetrade 暫時應該係收費最平, 但係佢嘅缺點就係投資產品比較少,同埋如果你買非英鎊產品, 例如美國股票,一來一回嘅匯率收費比 IBUK 高 15倍!0.03% vs 0.45%! 但係如果你只係投資某類型 ETF,例如 Vanguard, iShares, Invesco ETFs, 咁就好啱你用。 如果你想投資多類型產品,比較推薦你用 IBUK,海量選擇,匯率超級好。


獅子山廣場網上市集商店營業中! 立即睇睇 ->


獅子山廣場係一個免費嘅平台。一個屬於英國香港同路人嘅平台!

嚟到英國有嘢想同人分享?有嘢想推介或提下人唔好中伏?想睇吓一啲貼地嘅生活資訊?想開創事業?自己做 Freelance?想搵香港人幫手?想搵食譜? 想更加容易管理刊登資訊同書簽?想收到我哋最新資訊? 歡迎註冊做獅子山廣場 Lion Rock Plaza 會員 !香港人自助互助!

如果你覺得我哋嘅資訊有用,可以幫忙撳吓廣告,以維持本站運作,謝謝。

Related Posts

Leave a Reply

Your email address will not be published. Required fields are marked *