汽車保養 Warranty / Service / Insurance
好多朋友喺香港無揸開車，嚟到英國買車代步，喺保養保險細節方面難免會有啲混淆。究竟部車有幾多年原廠保養？包括乜嘢？有乜嘢情況之下會喪失咗保養？乜嘢係定期保養？ 汽車保險包括乜嘢方面嘅維修？ 以下為你解釋一下。
由於中英文差別， 有時會將 Warranty 同 Service 都譯做保養。問題就出喺呢度，其實兩者係有好大分別。Warranty 翻譯做保用，Service 翻譯做保養會比較合適。
Warranty 包括乜嘢？
Warranty 即係原廠保證車輛喺某段期間內工作正常。Warranty 期內如果有任何機件問題，原廠會負責維修。用 Toyota 做例子，原廠包括以下項目：引擎，供油系統，冷卻系統，波箱，避震系統，轉向系統，煞車系統，電子系統，車身防銹等等。 原廠 Warranty 過期之後，有啲車廠會提供延長保養計劃，當然要額外付費。
基本上所有車廠網站都會詳細列明 Warranty 項目。每間廠項目都會有些微差別，但係大致上都差不多。就算你買嘅係二手車，係 Warranty 期內，原廠都係需要幫你維修的，當然有啲情況係會冇咗原廠保養，下面會詳細解釋。
Warranty 唔包括乜嘢？
原廠 Warranty 一般唔會包括任何損耗品及人為損壞。需要定期更換損耗品例子：煞車皮，引擎潤滑油 (偈油)，電池，輪軚，火嘴等等。Warranty 亦不會包括會老化嘅零件，例如膠喉，塑膠製品等等。每間車廠保養情況可以喺官方網站度搵得到。
乜嘢情況之下會冇咗原廠 Warranty？
一般原廠 Warranty 係以年計算，又或者喺某個里程範圍之內。 例如 Toyota 提供 10 年或 100,000 英里保養，如果你揸六年就已經到 100,000 英里，保養就會喺第六年結束。 要有原廠 Warranty， 基本上所有車廠都要求車主定期做 Service / Maintenance。如果冇依照車廠要求日期做 Service，車廠有權唔提供 Warranty。
另外，車廠通常要求車主返原廠做 Service，自己喺出邊搵車房做未必會承認。如果你買嘅車仲喺原廠 Warranty 期內，建議你返原廠做 Service。大家購買二手車嘅時候，最好問返上手車主攞 Service 記錄。 如果你搵到一路喺原廠做 Service 嘅二手車就會比較好，因為可能仲會有原廠 Warranty。通常去官方車行購買 Approved Used 車都會好清楚講俾你知仲有冇原廠 Warranty 同埋仲有幾耐。
另一個會影響原廠 Warranty 嘅因素就係你架車嘅用途，如果你用架車做 Uber 或者送外賣等等，原廠 Warranty 會有唔同嘅要求，詳情可以參考返車廠嘅資料。
乜嘢係 Service / Maintenance？
Service 或者 Maintenance 即係汽車嘅日常保養。香港嘅車廠好多時都建議 5000km 或者半年做一次 Service，比起官方說明書講嘅期間要短好多，好多車主都覺得香港代理商要求比較奇怪。英國呢邊代理通常都會跟返車廠官方指引，一般嘅要求係 10,000 英里 miles (16,000km) 或者一年做一次 Service。要繼續享有原廠 Warranty，就要定期回原廠做 Service。 我哋比較過呢邊做原廠 Service 一般比香港平，而且一年只需要做一次，養車成本比香港平。
Service / Maintenance 一般包括更換引擎潤滑油 (Engine Oil)，油隔 (Oil Filter)，一般檢查。 其他額外項目通常額外收費，例如煞車皮。原廠通常會建議一年小保養，一年大保養，每間車廠包括嘅項目唔同，你可以選擇逐次俾錢，亦都可以購買一啲保養計劃。通常幾年嘅保養計劃會比較平啲，亦都可以用月費形式付款。保養計劃一般係跟車的，你有機會買二手車嘅時候架車係有保養計劃，可以上車廠網站查詢得到。
我買咗汽車保險？架車壞咗有得賠？
汽車保險，一般分為第三者保險以及全保，中間仲有一種就係第三者保險加盜竊及火險。汽車保險嚴格來講係汽車意外保險，即係話出咗意外先會有得賠，通常唔包括正常使用情況下的維修。第三者保險只會賠償比第三者，自己車輛嘅維修係冇得賠。 全保就會包括你自己嘅車輛維修費用。喺香港買全保同第三者保險價錢可以差好遠，不過喺英國呢邊價錢只係差好少，絕對建議你買全保。 汽車保險牽涉嘅項目繁多，唔喺度詳細討論，總而言之，汽車意外保險係唔會包括正常維修及日常保養。
希望以上資訊幫到各位新車主。
獅子山廣場網上市集商店試業中！ 立即睇睇 ->
獅子山廣場係一個免費嘅平台。一個屬於英國香港同路人嘅平台！
嚟到英國有嘢想同人分享？有嘢想推介或提下人唔好中伏？想睇吓一啲貼地嘅生活資訊？想開創事業？自己做 Freelance？想搵香港人幫手？想搵食譜？ 想更加容易管理刊登資訊同書簽？想收到我哋最新資訊？ 歡迎註冊做獅子山廣場 Lion Rock Plaza 會員 ！香港人自助互助！
如果你覺得我哋嘅資訊有用，可以幫忙撳吓廣告，以維持本站運作，謝謝。
