想飛？點樣攞疫苗護照？
隨着好多國家放寬入境限制， 尤其是歐洲嘅熱門旅行國家，包括法國、瑞士、德國、西班牙等等，只要你打咗兩劑疫苗，有疫苗護照，入境就唔需要隔離 ( 每個國家要求唔同，以下有解釋 )！最重要係返回英國都係唔需要隔離，只係需要做個 Day 2 測試已經可以。以下講吓點樣攞到疫苗護照。
假設你已經登記咗家庭醫生登記， 詳情請睇呢個網頁， 登記好之後 NHS 會寄信俾你，跟住俾個 NHS 號碼俾你，呢個號碼好重要，如果你唔見咗可以喺以下網頁查詢：
查詢 NHS 號碼需要姓名，出生日期及郵遞區號 (Postcode)。
有咗 NHS 號碼之後，就可以去打疫苗啦，而家好多地方係唔使預約就咁行入去就可以打。建議大家有咗 NHS 號碼之後先至去打疫苗，因為可以直接記錄去你個戶口，雖然你未有號碼都可以去打，但係之後如果要補返紀錄比較麻煩。
另外，一定要下載 NHS App， 裏面可以睇到你健康服務嘅資料，包括打疫苗嘅情況，同埋提取疫苗護照。
下載之前最好準備好護照嘅相喺手機，因為佢係需要你上載護照做認證， 同埋要確保護照嘅資料非常清楚冇嘢遮住。 上載護照之後佢就會掃描你個樣做認證。 除此之要你嘅出身日期，NHS 號碼，姓名同埋 Postcode。
姓名嗰部份有一點需要留意，因為你個名係由你嘅 GP 幫你入，有人試過個名係冇咗中間，例如 Tai Man Chan 會變咗 Tai Chan。如果你申請嘅時候發覺個名唔啱，可以試吓唔入中間個名，不過之後需要搵 GP 幫你改返，因為你疫苗護照個名同護照唔同唔知會唔會有影響。
你去打疫苗嘅時候，記得一定要比 NHS 號碼， 打完之後就可以喺個 NHS APP 睇到紀錄。Barcode 下面顯示嘅過期日子， 唔係你疫苗過期嘅日子，只要你每次開返個app佢就會更新。 疫苗嘅有效期通常係九個月至一年，視乎不同國家而定。
除咗手機 NHS App 顯示疫苗護照之外，你可以利用 NHS 網站下載 PDF，有啲國家係需要紙本嘅證明。你亦都可以喺網站上要求佢哋寄俾你。
留意疫苗護照暫時只適用於16歲或以上人士。有啲國家唔需要12至18歲人士出示疫苗護照，每個國家唔同，請先參考以下資料。
離開英國去旅行注意事項
- 先檢查你想去嘅目的地入境要求
- 有好多歐洲國家，包括熱門嘅法國，德國，瑞士，西班牙等等已經唔需要打齊疫苗嘅人士入境隔離，只要你提供證明就可以。 英國政府整理左相關資料喺佢哋網頁， 計劃旅行前可以去睇吓相關資料，睇吓自己合唔合要求。每個國家對小朋友嘅要求唔同，大家出發前一定要睇清楚。
- 安排 COVID-19 測試， 如果你嘅目的地國家需要你提供測試證明，你可以自費做測試。
- 準備好疫苗護照
- 查清楚返回英國程序及要求
- 基本上如果你係英國居民，打齊疫苗，現時由任何國家入境英國均唔需要隔離，但需要預訂 Day 2 測試及填寫入境表。
- 如果你冇打齊疫苗，你入境則需要隔離10日。
- 雖然英國四國有自己嘅要求，但係大致上都係一樣。
如果你喺國內旅行，包括 England, Wales, Scotland, Northern Ireland, 以及 Common Travel Area：the Channel Islands, the Isle of Man 及 Republic of Ireland，則冇特別限制，除非你10日內有去過其他國家。
想收到我哋最新資訊？有嘢想刊登？想更加容易管理你嘅評語同埋書簽？歡迎註冊做我哋會員，完全免費！
如果你覺得我哋嘅資訊有用，可以幫忙撳吓廣告，以維持本站運作，謝謝。
