英國租屋收鎖匙細節位要留意
關於英國租屋步驟，網上已經有很多討論及文章分享，但係有啲細節位，真係要住落同埋經歷過先知道。獅子山廣場 Lion Rock Plaza 有幾個貼士，希望幫到大家：
- 最好要攞到屋主聯絡電話。屋主應該係最清楚間屋情況同埋器材操作，能夠直接聯絡屋主最好。
- 最好要求業主留低所有器材嘅說明書，例如洗衣機，焗爐，洗碗碟機，Boiler 定時開關，防盜警鐘等等。如果太舊嘅器材，網上面都未必搵得到說明書。洗碗碟機要定時加洗碗碟機專用的鹽同埋清理過濾器，鹽可以將硬水變做軟水，令到洗碗碟機效能更好，例如下面說明書有解釋，當然每個型號唔同，所以有說明書比較好。
- 攞鎖匙當日要詳細檢查所有地方，包括來去水位， Boiler，所有門窗開關，所有家庭電器例如焗爐，記得要影相拍片，如果同你嘅 Inventory Report 有出入，就立即將資料send俾地產代理，作為記錄，或者要求跟進。
- 一定要試吓暖氣，每塊發熱版摸吓有冇問題，因為可能有啲水喉會塞咗，會導致有啲發熱版只係得一部份熱，業主有責任保養維修。
- 一定要問到上一手能源供應商資料，水方面應該冇選擇，但係電同埋煤氣就可以選擇不同供應商。如果你唔想麻煩，用返上一手用嘅能源供應商應該轉換帳戶係最順暢，如果你要轉新供應商，都要知道上一手係乜嘢供應商，方便計算賬單。
- 要求業主處理好水費電費煤氣費。最麻煩嘅情況係，上一手住客，或者屋主，搬出時冇清水電煤費用，又或者係跟估計讀數去交錢，你收到嘅賬單好可能要俾埋上手嘅錢，要處理係好麻煩。
- 攞鎖匙當日一定要影低水錶，電錶，煤氣錶讀數，雖然通常 Inventory Report 會有，但你自己影一次留底都好。電錶煤氣錶通常喺屋外面一個盒裏面，要條鎖匙開，如果唔見咗條鎖匙可以去買返。條鎖匙嘅樣好似下面咁：
- 水錶有機會係你屋外面行人路有個蓋冚住，好似下面張圖咁，要問返地產代理或者業主喺邊度，
- 租屋俾你嘅業主，有責任清潔好間屋先交俾你。 你可以問地產代理，幾時安排清潔，同埋清潔會包乜嘢項目，如果冇包嘅項目你可以考慮自己自費清潔，例如洗地氈。
- 如果有花園，你有責任剪草，但係其他樹木就係業主嘅責任，而你亦都唔可以隨便斬咗佢棵樹。想慳功夫啲可以買下圖嘅剪草機，唔太貴，後面有個箱收集剪咗嘅草。要留意花園嘅垃圾要分類回收，有啲地方係要額外俾錢 Council 回收。
- 正常情況唔可以自己換鎖，配鎖匙，一定要得業主同意。
- 入住之後去你所屬嘅 Council 網頁查清楚幾時收垃圾。家居垃圾，可回收垃圾及花園垃圾要分開處理。通常花園垃圾要額外俾錢。家居垃圾通常要用佢提供嘅垃圾袋，如果唔係佢會唔收。 可回收垃圾每個地方唔同，要自己查清楚邊類野可以回收。
- 登記 Council Tax 時候， 加晒所有成年人嘅全名上去，跟護照嘅名，呢個係最好嘅地址證明，有啲特別嘅服務，例如買賣股票證券行，只係接受 Council Tax 嘅賬單證明。水費電費煤氣費可以考慮分開申請，唔好集中一個人，咁大家都會有地址證明。
希望以上少少貼士對大家有用，想即時收到我哋最新資訊，或者留言，或者新增任何資訊，請Register Now！
如果想分享我哋嘅文章去Facebook，Twitter 或者 Pinterest， 可以用下面 D 分享 icon。
歡迎轉貼獅子山廣場 Lion Rock Plaza 內容，但請註明出處及附上連結，謝謝！
如果你覺得我哋嘅資訊有用，可以幫忙撳吓廣告，以維持本站運作，謝謝。
