想換車？英國買車好容易，賣車又難唔難呢？
未講賣車之前，先講吓買車！
好多朋友發現嚟到英國買新車要等幾個月至半年以上，買舊車嘅價錢又不斷升，有啲新嘅二手車直頭同新車一樣價錢。如果急用車，真係幾麻煩。住喺英國，冇車都幾唔方便，車係英國人心目中係一個日用品，所以都唔會就住用，好多二手車年份好新但係都可以好殘好舊，大家就算心急都好，買車最好先睇到架車先決定，雖然網上面有好多公司係可以送去你屋企，講明某段期間可以原價收回，但世間上邊有咁理想嘅嘢，你想退回架車未必咁順利，佢哋亦都會好多藉口。網上有好多買車教學，喺呢度就唔詳細講。
入正題，講返賣車。
可能有朋友嚟到買部二手車操練，跟住再訂架新車，咁二手車點樣賣出去呢？由於英國擁有汽車係好普遍，所以賣車亦都好多渠道，甚至乎可以坐喺屋企全程搞掂晒。以下介紹吓賣車嘅途徑。
車行回收
如果你買新車，可以將你舊車 Trade In， 呢度叫 Part Exchange。呢個方法最乾手淨腳，當然價錢未必係最好， 但係你可以揸舊車揸到攞新車嗰一日，無縫轉接。
私人賣車網上登廣告
好多香港人喺香港賣車都係網上賣，例如 28car.com。呢度最出名嘅網站就有 autotrader.co.uk 同 pistonheads.com。 但係如果你有睇過呢兩個網站，你會發現私人出售嘅數量係比較少，大部份都係車行出售。點解咁多人選擇將車賣俾車行呢？ 一來免卻左睇車約時間嘅手續，因為英國比較大，唔似得香港咁咁容易約到出嚟睇車；二來比較安全，英國嘅銀行對於過數好嚴格，好多時轉錢會出現問題，如果私人同你買車，點俾錢你係一個難題，比現金你你都驚係假錢，過數又未必即時過到，支票就更加危險。所以好多人選擇車行，可以即時銀行過數，睇到條數先至交車。
當然每件事情都有兩面，私人買賣可以慳返一筆錢，如果搵到相熟又信得過嘅人當然冇問題。英國亦都有上門驗車服務，比較出名嘅係 AA。 收費大約係 £142 – £191，時間地點可以自由選擇。如果你買嘅二手車有晒原廠保養紀錄， 咁就最好。有啲二手車可能有買到原廠 Service Plan， 呢啲計劃係跟車走，你買車嘅時候可以用得返。
賣比附近車行
你可以就咁揸架車去附近車行，叫佢哋估價，價錢啱你就可以賣俾佢。但係個問題就係你去唔到好多間車行，未必可以賣到理想價錢。
網上收車公司
最受歡迎應該係呢種途徑，有好多專門收車公司，你跟佢哋程序，將你架車嘅資料upload上去，基本上佢可以即時比到一個估價俾你，當然你有心理準備個估價係最高估價，好多時會因應你架車嘅情況回收價格會比較低啲，但都唔會差到好遠。
比較出名嘅公司有 webuyanycar.com, motorway.com, wizzle.co.uk 等等。佢哋嘅運作方式有兩種。
1. 直接收車
webuyanycar.com 喺你網上估價之後，佢哋俾出咗價錢，你就約時間將架車揸去佢哋分行， 佢哋會作最後估價，你覺得價錢啱就可以放低架車比佢哋。 網上面流傳一個方法，就係佢俾咗估價之後唔好立即回覆，可能等幾日佢會出個更加高嘅價錢俾你，未經證實，純粹網上資料。
2. 價高者得
motorway.com 同 wizzle.co.uk 呢一類就係你將車輛詳細資料上載去佢哋網站，包括成架車每個角度嘅相片，有任何損壞刮花嘅地方，要影相比佢哋。佢哋初步會俾個估價你，通常都係最高價值。跟住佢哋會聯絡不同車行落標，價高者得，中標嘅車行就會聯絡你去你屋企收車。
通常中標價格都會低少少，但係都唔會相差太遠。最緊要你上載資料嘅時候要俾埋有任何損傷嘅地方，咁個價錢就唔會差太遠。 影相之前記得清潔好架車，咁樣個價錢可能會賣得好啲。
後續文件處理
無論你用任何方法買車，都要預備好你嘅 V5 logbook。 如果你有原廠保養紀錄都要預備埋，佢哋好睇重呢樣野。另外兩套車匙，如果唔齊會扣錢。 當然仲有你嘅銀行戶口，方便車行即時過數俾你，基本上車行係會可以做到即時過數，你可以睇到銀行有錢先交架車俾佢哋。
如果你係賣俾車行，佢哋會俾返 V5 logbook 第四部份俾你，上面會有佢公司資料，你可以上網向 DVLA 匯報返賣咗俾車行。如果你賣俾私人，咁你應該只係比第六部份新買家，跟手又去 DVLA 網站匯報返你已經賣咗架車比另一個人。 兩者應該唔會撈亂，因為車行收車，牌簿唔會多咗一個 Owner，佢哋唔會想有咁嘅情況發生，因為會影響二手價。
如果你架車仲有剩低嘅 Road Tax，DVLA 會自動寄返支票俾你。如果你仲有剩低嘅保險，你都可以向保險公司匯報，佢哋會退返俾你。 但係最好嘅做法係將舊嘅保險轉落去新車度，咁你嘅 NCB 就可以一路儲落去。
想賣返架車比香港人？
不妨考慮吓註冊做獅子山廣場會員，刊登你架車嘅資料，我哋大部份讀者都係香港人，有緣嘅話仲可以識多個朋友！
如果你覺得我哋嘅資訊有用，可以幫忙撳吓廣告，以維持本站運作，謝謝。
Sam
2024-04-01 在 10:10 上午想請教，如果賣車之後，舊車個保險點處理？是否要賣車前先通知保險公司 cut 咗個保險？
獅子山廣場 Lion Rock Plaza
2024-04-01 在 10:03 下午是的，通知保險公司，可以選擇取消保險，亦可選擇將保險過到新車，留意兩種做法都可能會有手續費，手續費亦可能唔同，打電話問清楚最好。