英國迴旋處及詳盡路牌解說檔案下載
英國周圍都係迴旋處，有大有細，好多唔係喺香港渣開車嘅朋友過嚟未必咁習慣。以下有少少心得同大家分享吓，先申報下我哋唔係專業駕駛師傅，只係一啲經驗分享，如有謬誤，歡迎指正。
開始分享之前，大家可以下載呢份 Department for Transport 嘅路牌解說檔案！可能好多朋友都係用香港車牌換英國車牌，雖然香港交通系統源自英國，但係兩個地方都有好多唔同，呢個檔案有晒所有路牌嘅解說，如果唔想俾人抄牌，絕對需要參考。
英國其實都有道路使用者守則，比駕駛人士嘅叫做 The Highway Code，如果你想了解多啲英國道路系統，可以參考吓。 官方網站為：
入正題，以下為 The Highway Code 對於迴旋處嘅圖解：
基本上係三個情況，藍色車直去 (12點方向)，綠色車轉右(3點方向 )，橙色車轉左(9點方向)。
以上只係一個好基本嘅情況，大家有個概念跟着以下步驟做：
- 盡早選定行車線，有啲迴旋處可能有三至四條線，通常都會有路牌指示你轉左轉右直去，如果你喺迴旋處第一個出口出，就叫做轉左，如果你喺迴旋處12點方向或者之前出就係直去，如果你過咗12點方向出就係轉右。
- 睇路牌，睇地下畫線，因為迴旋處有不同種類，一定要睇清楚路牌同埋地下或線，跟住條線行。
- 打燈，第一個出口出(橙色車)打左燈，直去(藍色車)入迴旋處唔需要打燈，直至到你出迴旋處先打左燈。 轉右(綠色車)方向打右燈，到你出迴旋處嘅時候打左燈。
- 減速，絕對需要讓右邊車輛先行。
- 入迴旋處絕對唔可以胡亂轉線，你要當自己行緊條直路， 保持喺自己條行車線。如果需要轉線，例如出迴旋處，絕對需要檢查清楚隔離線有冇車同埋一定要打燈！ 以下就係一個好好嘅例子：
- 如果你想出迴旋處但係左邊有車你轉唔到線，咁你就行多個圈保障安全！
- 而家有好多英國嘅迴旋處都係螺旋式，如果迴旋處出口有兩條線，你就跟地下條線行，千祈唔好做外圈人 (藍色路線)， 例如下邊嗰幅圖：
- 絕對需要多望左右鏡，因為英國有好多單車，或者有人騎馬！
- 如果你行錯路，唔好驚慌，繼續安全地向前行，搵個安全地方停車，睇地圖再行返轉頭！
英國迴旋處千變萬化，就咁簡單幾句好難講晒所有例子，以下有一條好詳細嘅影片，係由一位英國教車師傅解釋不同情況，非常清晰及有參考價值，佢嘅英文亦都非常容易聽，絕對值得花時間睇一睇！
睇完上面嗰條如果你都仲想了解多啲，以下呢一個係官方 High Way Code 有關迴旋處嘅討論網頁，裏面都有一條片值得參考：
想收到我哋最新資訊？有嘢想刊登？想更加容易管理你嘅評語同埋書簽？歡迎註冊做我哋會員，完全免費！
以上圖片來自各相關網站，網址已經在圖片下列明。
如果你覺得我哋嘅資訊有用，可以幫忙撳吓廣告，以維持本站運作，謝謝。
