上次試過 Croydon 榮業行嗰間大同酒樓，麻麻哋。 今次去倫敦北面嘅金龍軒，貪佢免費泊車，唔使入倫敦市中心，飲完茶可以直接再揸車去榮業行，十幾分鐘就到。

星期日去，比平時早1小時開門， 11 點就開，我哋去到剛剛開門，直入唔使等位，齊人先可以入去。如果你遲啲去通常都要排隊。餐廳環境算唔錯，座位寬闊，枱同枱之間有適當距離。侍應生開茶落單都係講廣東話。餐具衛生情況滿意。

比起之前試嗰間大同大酒樓，呢間質素明顯好好多，佢隸屬於皇朝集團，即係可以喺中超買到嘅皇朝點心同一間集團，平時都覺得佢質素唔錯，喺酒樓食當然更加好。今次淨係試咗點心，試咗好多款，全部都好有水準好新鮮！腸粉夠滑，炸點唔會太燶。埋單價錢合理，絕對可以一試！

傳統英式蛋糕甜品店，英式下午茶嘅份量兩個人係食唔晒！價錢為 £30，包括蛋糕，鬆餅，三文治同埋兩杯飲品。 蛋糕鬆餅三文治質素唔錯，但係最出色嘅係牛油！你冇聽錯，係牛油。非常新鮮嘅牛油，幼滑，柔軟，入口即溶。佢哋仲好慷慨咁俾咗好多俾你，下面圖片鬆餅中間嗰兜就係牛油，三文治入邊亦有好多牛油，成日食真係搞唔掂！

疫情嚴峻，出唔到國去旅行，都可以享受下外國地道美食。The Real Greek 希臘餐廳提供地道希臘食品，價錢亦都合理。

今日去食咗午餐，叫咗 Greek Trio， 十分抵食，只需要 £8.5， 上菜用一個三層高嘅架，每樣菜一層，好特別。

前菜希臘 Flat Bread， 配上鹰嘴豆泥 (HOUMOUS) 及 SPICY FETA DIP，由餐廳自行調配，香濃而不膩，不會過鹹。

主菜選擇左香腸及炭燒雞肉。香腸肉質彈牙，可惜個人感覺太鹹。 雞肉陣陣炭燒香味，不會太乾，好食！ 配菜有薯條及薯仔，薯仔 (New Potato) 用橄欖油及香草焗制，香滑， 入口即溶。薯條外脆內軟。

下次一定要試吓佢嘅8道菜套餐，兩個人可以試到16樣嘢！

英國已經唔係二三十年前嘅美食沙漠，多咗好多特色餐廳，有機會大家都可以試吓！

Morrisons係咁多間超市比較下唔算係最平，但係會周不時有減價，另外就過期嗰啲食品會貼yellow label大平賣。Morrisons有新鮮海鮮肉類揀，仲有家品小電器衣物等等，超多選擇〜 share下圖中我最近買左嘅嘢: 小型fan heater係12£咋

去行百貨公司，見到呢間餐廳有個火爐焗 Pizza，即刻俾佢吸引咗去食。 坐低睇吓餐牌，樣樣都想試，最終係冇食到 Pizza。 最吸引係凍肉同埋火腿，全部來自西班牙同意大利。另外就係細細碟嘅 Tapas，分量少少，所以試咗幾樣。 食品質素十分好，值得推介！

1. Hand carved Jamón Ibérico de Bellota 36 month aged – Spain £9.5
西班牙黑毛豬風乾火腿，細細塊，十分之香，但又唔會太鹹！

2. Grilled octopus tortilla with mojo verde £9.5
八爪魚西班牙奄列， 用薯仔做主材料， 版嘅生熟程度啱啱好，切開熱辣辣，薯仔夠淋，蛋夠滑， 八爪魚新鮮彈牙唔韌。

3. Polpetti – Italian meatballs in tomato sauce £7.5
新鮮嘅肉丸配蕃茄汁，咬落去肉汁豐富。

4. Gambas a la plancha with garlic and chilli £10
大蝦十分新鮮， 爽口，醃製酸青椒好好食。

5. Charcuterie SHARING BOARDS £12
凍肉拼盤，基本上每台客人都會叫呢個，主打菜式， 凍肉質素十分高！

6. Housebaked breads £3.5
自家製麵包，記得要點橄欖油加醋！

下次去一定要試吓佢嘅 Pizza！