熱水器 Boiler 溫度過低引致疾病
熱水器 Boiler 係所有英國家居必定有嘅裝置，用煤氣又好，用電又好，主要供應熱水以及中央暖氣。 好多朋友都想節省煤氣或者電費支出，尤其是近來能源價錢不停上漲，可能你會將熱水器嘅溫度調低啲，諗住慳返啲錢，但係將溫度調得太低有可能會影響健康！
通常熱水器有兩個溫度要調校， 一個係熱水溫度，即係平時沖涼或者水喉出嚟嘅熱水。另一個係中央暖氣熱水溫度，英國大部份中央暖氣都係用熱水發熱，如果你係用電嘅就可能冇呢個溫度調校。調校溫度請參閱你嘅熱水器說明書。
熱水溫度設定不能過低
一般熱水器有兩種，一種係儲水式 (Water tank / converntional boiler)，即係煲熱左之後會儲存係一個大水缸，另一種就係我哋香港常用嘅即熱式 (Combi boiler)。如果你使用傳統儲水式熱水器，切勿將溫度設定低過 60°C！ 喺香港我哋成日聽到退伍軍人菌 ( Legionella )，呢種細菌喺 60°C 以下會好容易滋長，60°C 以上嘅熱水就可以殺死呢種細菌。使用儲水式熱水器，溫度過低，就會有機會染上退伍軍人症。雖然即熱式熱水器冇水缸，但係都建議唔好將溫度設定得太低，因為係英國我哋經常都係用熱水洗手洗碗。
如果你每日都用洗碗碟機，將熱水溫度調高啲，都可以慳啲電，因為英國電費比煤氣費貴。洗碗碟機一般都有發熱線，加熱熱水。如果熱水溫度太低，相對就要用多啲電加熱。 一般洗碗碟機最少都要將熱水溫度加熱到65°C，以達到殺菌 清潔目標。 如果你係好舊式嘅洗碗碟機，冇加熱功能，更加要將熱水爐溫度提高，以免影響清潔以及殺菌效果。
中央暖氣溫度設定
根據我哋蒐集到嘅資料，熱水器製造商同埋資深嘅服務供應商都建議將溫度設定係 70°C 至 75°C 最為理想。將溫度調得太低會有兩個問題，第一就係間屋要好耐先熱，煲水時間長咗，第二就係當熱水走勻全間屋再返到去熱水爐嘅時候， 溫度跌得太多，變相又要嘥多啲煤氣去煲翻熱啲水。
同樣道理，網上有唔少文章教人短時間間歇性開中央暖氣，以節省金錢，但咁樣做有機會得不償失，因為中央暖氣嘅熱水根本未到達需要嘅溫度，跟住已經熄火，轉頭又要再煲過。以我哋嘅經驗，同埋請教本地人嘅經驗，基本上每日開關兩次至三次係最好。例如早上起身前一小時開始開暖氣，到差不多中午時分溫度最高嘅時候關，跟住到黃昏再開，直至到瞓覺前一至兩小時。瞓覺嘅時候可以唔開暖氣，一來唔使咁乾，二來冚左被鋪其實都會暖。每次開暖氣嘅時間可能持續幾小時，咁樣就唔需要不停咁煲水。
除咗熱水器溫度之外，控制中央暖氣開關仲有溫度計 (Thermostat)。一般英國煤氣師傅及煤氣供應商都建議設定喺 20°C 左右最適合，溫度計探測到咗 20°C 就會自動關熱水器。如果你嘅熱水器處於關閉嘅狀態，呢個溫度計當然唔會有用。
電子式溫度計 ( 圖片來自 Amazon)
除此之外，大家都要留意你個溫度計係邊個位置。如果你個溫度計位於一個好凍嘅位置， 例如靠近大門或者窗口，而你又將附近嘅發熱板 (Radiator) 關咗，咁變相你間屋嘅溫度就會比你嘅設定高好多，因為佢要靠其他地方嘅發熱版將熱力傳送去到溫度計附近。相反亦然，你個溫度計喺鄭發熱版隔離，咁佢可能好快就會停止工作。大家要因應實際情況設定溫度計溫度。
當然每間屋都唔同，每套系統又有差別，大家可以用以上嘅溫度作為一個開始，測試下乜嘢溫度最啱自己同埋最慳煤氣。亦都可以考慮買返個溫度計放喺屋企，睇吓實際個溫度。
如果你處於極度嚴寒地區，經常氣溫係攝氏零下，可以考慮唔完全關上暖氣，將溫度調低，以免水管破裂。
監察自己用電及用煤氣情況
如果你未安裝智能煤氣或者電器錶， 可以考慮安裝，可以每半小時傳送一次讀數去你個能源供應商戶口，通常能源供應商都會有網上戶口俾你可以睇到使用量。
你亦都可以喺佢個監視器睇到每日用電用煤氣情況。每個監視器詳細使用方法唔同，請參考你供應商提供的說明書。
無論係網上戶口使用量或者屋企個監視器，通常都有得俾你選擇顯示金額或者能源單位 kWH。由於能源價格不停上升，如果選擇顯示金額未必能夠真實反映使用能源情況，建議選擇顯示 kWH 作比較，咁樣先會真實比較到究竟你係用多咗定用少咗能源，從而評估你嘅設定或者開關時間究竟有冇幫你慳咗。
希望以上嘅資料能夠幫到大家慳錢又保持健康身體！
獅子山廣場係一個免費嘅平台。一個屬於英國香港同路人嘅平台！
嚟到英國有嘢想同人分享？有嘢想推介或提下人唔好中伏？想睇吓一啲貼地嘅生活資訊？想開創事業？自己做 Freelance？想搵香港人幫手？想搵食譜？ 想更加容易管理刊登資訊同書簽？想收到我哋最新資訊？ 歡迎註冊做獅子山廣場 Lion Rock Plaza 會員 ！香港人自助互助！
如果你覺得我哋嘅資訊有用，可以幫忙撳吓廣告，以維持本站運作，謝謝。
