喺英國借車俾人或者借人車可能觸犯法例！
英國嘅汽車保險同香港嘅汽車保險有所不同！
首先我哋睇吓以下嘅新聞報道，於2016 至 2018 期間，由於沒有相關車輛保險，警察總共拘留3000架車！
香港嘅汽車保險係跟車，如果你借車俾朋友，萬一發生意外，保險公司都會受理，最多要比額外薦底費，例如非記名司機薦底費，年輕司機薦底費，駕駛經驗不足薦底費。香港保險公司最低限度會有第三者保險，至於額外損毁則扣除薦底費後再賠償俾你。
英國嘅汽車保險係跟車又跟人，除非你買嘅汽車保險包埋你揸其他人車（Driving Other Car, DOC / Driving Other Vehicle, DOV )，否則，萬一出意外，連第三者保險都唔會賠！ 如果一個冇車嘅朋友問你借車，而你朋友冇汽車保險，又或者佢嘅汽車保險唔包括 DOC， 萬一有意外，牽涉第三者，賠償金額可能會係天文數字！反之亦然，如果你冇汽車保險，又或者你嘅汽車保險唔包括 DOC， 後果都會係一樣！
就算你嘅英國汽車保險包括 DOC，大部份都只係包第三者保險，就算你買嘅係全保 ( Comprehensive )，都唔會陪比你！
點樣知道你嘅汽車保險包唔包括 DOC？
大家需要去佢網站睇佢詳細嘅條文，以下就係相關條文嘅例子：
Marshmallow – 好受香港人歡迎嘅保險公司，因為承認香港嘅 NBC， 佢講到明係唔包括 DOC：
Admiral – 一間英國好大嘅汽車保險公司，如果你幫襯佢買全保， 佢有機會包括 DOC， 視乎不同人而定。
Liverpool Victoria – 評語都唔錯嘅汽車保險公司， 呢間保險公司係包括 DOC：
留意包括 DOC 表示你借人哋架車係有第三者保險嘅保障，其他損毁或意外唔會有賠償。你借架車俾人就要睇借車嗰個人有冇相關保險，你有不等於佢有。
如果你嘅保險唔包括 DOC 而你又借人哋架車渣，其實係犯法，會被罰定額罰款及最少扣6分 (DVLA Code IN10)。
大家買保險之前，記得去你間保險公司度睇清楚再決定！
點樣可以避免以上情況呢？
- 如果你部車同親人朋友一齊用，咁就最好喺保險上加名，雖然保險費會貴啲，但係任何記名司機都會得到相同保障。
- 如果萬一要借車，可以買臨時保險 (Temporary car insurance)，由幾個鐘至幾日幾星期都可以買，最少會有第三者保障，唔會犯法！當然你可以俾多啲錢買全保都得，留意通常只接受有英國駕駛執照嘅人士購買。
希望以上嘅資訊能夠幫到大家！
嚟到英國想開創事業？自己做 Freelance？有嘢想同人分享？有嘢想推介或提下人唔好中伏？想搵香港人幫手？想睇吓一啲貼地嘅生活資訊？想搵食譜？想收到我哋最新資訊？想更加容易管理你嘅評語同埋書簽？ 歡迎註冊做獅子山廣場 Lion Rock Plaza 會員 ！自助互助！
如果你覺得我哋嘅資訊有用，可以幫忙撳吓廣告，以維持本站運作，謝謝。
