揸車去倫敦邊度泊車好？順手買埋日本手信！
大家都知道如果要入去倫敦市中心，Zone 1 左右嘅位置係會收 Congestion Charge， 一日£15。 好多唔係住喺倫敦嘅朋友選擇開車去 Zone 2 附近再轉地鐵入市中心。泊車嘅選擇有好多，有啲係街道可以免費泊，亦都有收費停車場， 有啲 Zone 2 停車場收費高昂，一小時可以收你 £7.5，泊5個鐘就£45，唔係好經濟。獅子山廣場 Lion Rock Plaza 今日介紹一個類似香港又一城嘅大商場， 非常多泊車位置，而且係室內，價錢亦都相宜， 而且一出去就係地鐵 Central Line，大家可以考慮吓。
Westfield London 位於 Shepherd’s Bush，在 Hammersmith 上面，Notting Hill 右面。Westfield 有 另外一個商場位於 Stratford，千祈唔好搞錯，係 Westfield London 先啱。呢個商場裏面有大量名店，我哋遲啲再介紹下，先講吓泊車。 泊車收費非常經濟， 平日1小時£3，2小時£6.5，6小時£8.5，14小時£8.5，24小時£15； 星期六日1小時£3，2小時£6.5，6小時£9.5，14小時£12，24小時£15，最多可以泊72小時，如果要泊更長時間，可以先電郵通知佢哋。
佢有三個停車場，A 停車場係多層停車場，位於主商場，B 停車場係地庫停車場，位於北面嘅商場，但其實都係連接住一齊好近。C 停車場係露天停車場。 如果要轉地鐵去倫敦中心，我哋建議泊B停車場最好，泊完車扶手電梯一上去出商場行幾分鐘就到達地鐵 White City Station，直接乘坐地鐵 Central Line 就可以去到倫敦市中心，唔使轉車。記得搭地鐵千祈唔好就咁買飛，可以參考返上一篇文章。停車場入車時間有限制，A 及 C 停車場入車時間凌晨五點到第二日凌晨三點， B停車場入車時間早上九點到晚上11點。 三個停車場出車時間冇限制，廿四小時出車。
當你由停車場上去，會經過一間大型嘅日本舖頭 Ichiba，裏面有好多日本嘢賣，同時亦都有一個小型日本餐廳，有拉麵之類嘅嘢食，我哋試過味道都唔錯，價錢亦都唔太貴。呢間舖頭係倫敦唐人街附近 Japan Centre 嘅姊妹鋪，日本人開。當你去完倫敦中心返嚟裸車嘅時候，可以順便去行吓買下日本嘢。裏面貨品種類都算多，比倫敦中心嘅 Japan Centre 大。
呢個只係倫敦泊車嘅其中一個好地點，如果你有其他好提議，不妨留言分享吓！ 如果你對 Westfield London 或者 Ichiba 有任何意見，可以去我哋嘅分類度留言或者比星星，你嘅留言意見會幫到唔少人！
想即時收到我哋最新資訊，或者留言，或者新增任何資訊，請立即註冊！
如果想分享我哋嘅文章去Facebook，Twitter 或者 Pinterest， 可以用下面 D 分享 icon。
歡迎轉貼獅子山廣場 Lion Rock Plaza 內容，但請註明出處及附上連結，謝謝！
如果你覺得我哋嘅資訊有用，可以幫忙撳吓廣告，以維持本站運作，謝謝。
