牛津一日遊，玩完之後去咗食拉麵。

Ramen Kulture 店舖不大，但係裝修好有風格，而且一路播住日本歌。 我哋特登早啲去唔使等位，陸續都有客人。

今次試咗嘅食物包括有牛肉飯，咖喱拉麵，傳統豬骨拉麵，章魚小丸子同埋日式糯米糍。每樣嘢嘅食物質素都十分唔錯。

豬腩肉拉麵外皮煮得比較燶，同一般拉麵店舖有啲唔同。湯底夠味，唔算太鹹。最鍾意係個配料夠多。

咖喱拉麵十分有驚喜，因為唔係周圍有得食。

牛肉飯整體水準可以， 但係配菜比較特別。

章魚小丸子好食，唔會太粉。

最後日式糯米糍兩種口味都好好食。 大家有機會都可以試吓，推介！

已經幫襯過好多次，喺雷丁來講，呢間日本餐廳應該係質素比較好的。

一坐低通常佢會問你要唔要 Rice cracker，好食，有原味同埋黑芝麻味，俾埋辣醬俾你。

佢提供壽司，卷物，拉麵， 烏冬，蕎麥麵， 天婦羅， 刺身，鍋物， 丼等等，最特別係有麒麟生啤同埋清酒。

基本上大部份食物都試過，冇令人失望。餐牌上刺身只有四種， 三文魚，吞拿魚，油甘魚同埋甜蝦，不過咁多次佢都只係提供三文魚同吞拿魚。

小食比較多選擇， 有章魚小丸子，韓式炸雞， 日式炸豆腐， 枝豆等等。

價錢方面，我哋食咗兩份 Rice Cracker， 二杯生啤，一杯特飲，韓式炸雞，章魚小丸子，炸蝦天婦羅，牛肉鍋，炒蕎麥麵，鰻魚卷， 埋單 £87。

整體來講味道拍得住香港日本餐廳，唔會太西化，值得推介。

Cote 實在係性價比極高，三個人叫咗三個三道菜套餐 – Prix Fixe。

因為太肚餓，頭盤已經冇影相，但係質素十分唔錯，絕對唔係求其比盤沙律你。最好食係 Crispy whitebait 炸魚仔！Pork Terrine 味道亦十分唔錯，配麵包食一流。

主菜就記得有影相， 我哋分別叫咗雞，牛，同埋魚。Seabass fillet 煎得十分好，食得出好新鮮。Steak frites 係其中一個佢哋好受歡迎嘅菜式，薄切牛扒， 味道係十分好的， 而且明顯食到有炭燒味，但係牛扒用料可以再好啲，韌咗少少。Poulet Grille 非常香，但係雞胸比較鞋， 反而佢嘅配菜蘑菇薯仔更加好味！ 除此之外，我哋都叫咗忌廉青口，十分新鮮，絕對值得一試！

甜品在水準之上， Mess aux Fruits Rouges，Tarte aux Citron，Ice-cream and Sorbets， 都十分唔錯， 係檸檬 Tart 比較上酸。

值得一讚係佢嘅服務，前菜食完收晒所有嘢，重新換上餐具，絕對唔馬虎。最重要係性價比極高，英國外出用膳絕對唔平， 咁嘅價錢咁嘅質素難怪佢開到 90 幾間分店。如果你附近都有可以試吓！

去完 H Mart 買嘢順便係附近食晏晝。New Malden 有倫敦韓國城之稱，有好多韓國餐廳。今次選擇咗 Jin Go Gae。 如果早去嘅話門口就有地方泊車。 星期一至六有午市餐牌，星期日只開晚市。

雜錦韓國前菜：自己醃製，都算新鮮，份量比較少。
牛肉石鍋飯： 配料豐富，隻蛋煎得好靚， 記得要撈韓國辣醬食！
辣豬肉鍋配飯： 今次最好食係呢個，味道十分好，唔算太辣，配白飯一流。
海鮮烏冬：海鮮唔算豐富，亦冇咩特別，但係烏冬好食， 比起即食烏冬好好多。
雜錦天婦羅： 呢個係額外叫，要£15， 並不算特別好食，都係叫返韓國菜式好啲。

整體都唔錯，可能要就返外國人，整體我覺得比較甜。下次要去試吓佢嘅燒烤！

去位於倫敦南面嘅 Croyden 榮業行買嘢，一早去到飲個茶先。 大同大酒樓有兩層，我哋可能比較早去到，唔使等位就可以直入。入到去已經有唔少人坐低食緊野，當然有中國人，但係亦都有英國人同埋印度人。裏面侍應生大部份可以講廣東話， 喺裏面用廣東話溝通完全冇問題，叫嘢食方法係 tick 紙仔。上菜速度都唔錯，係有啲嘢要蒸就比較慢。基本上大部份香港普通酒樓有嘅嘢食都有。質素屬於屋村酒樓水準。

先講麻麻哋嘅嘢食：
叉燒酥比較燶，同埋唔夠熱，皮唔夠鬆化。
荔蓉芋角外層鬆化，但係好奇怪食唔到芋頭。
錦鹵雲吞就最差，燶咗，雲吞裏面只係得舊豬肉，仲要係唔好食嘅豬肉。

質素正常嘅嘢食：
鳳爪，家鄉鹹水角，奶皇包，叉燒包，蝦腸，牛肉腸味道， 臘味蘿蔔糕，沙律明蝦角正常。

比較特別嘅嘢食：
薑蔥牛柏葉，呢個自己比較難整，佢又整得幾好味，同埋最鍾意佢切到細細塊容易食。
蝦餃，感覺上英國啲蝦質素一般比香港好香港好，所以蝦餃都幾好味。
燒鴨，質素唔錯，但係最緊要係買到新鮮出爐的。

如果住喺附近，去榮業行買嘢飲埋茶就一流。不過留意停車場免費4小時，超時有機會會收到賬單。